Projekty

"Wuknyć wuknyć"

Kóždolětnje wotměje so w prěnim šulskim tydźenju za wšitkich šulerjow wuknjenski trening, kiž je specielnje wusměrjeny na jednotliwe šulske schodźenki. Naš projekt „Wuknyć wuknyć“ wopřija nimo poskitkow k specielnym wuknjenskim technikam a wuknjenskobiologiskej wědźe tež wšelake  zwučowanja, w kotrychž so nowe sposrědkowane wuknjenske metody trenuja a nałožuja.

Poskiti

Z mnohimi poskitkami podpěramy najwšelakoriše nadarjenosće našich šulerjow.

Wjele projektow přewjedźe so w ramiku wučby jednotliwych schodźenkow a předmjetow. Wosebite abo rjadownju přesahowace projekty su:

  • wopyt ptačokwasneho předstajenja SLA za rjadownju 5
  • znajmjeńša dwě dźiwadłowej předstajeni za kóždu rjadownju w běhu šulskeho lěta (serbsko- a němskorěčne)
  • dźiwadłowe předstajenje w jendźelšćinje
  • eko-dźeń do jutrowych prózdnin
  • wobdźělenje na wubědźowanjach
    • "Wysokoskok z hudźbu"
    • nazymski crossowy běh
    • kenguru-wubědźowanje
    • Olympiada serbskeje rěče
    • wubědźowanje wo najrjeńše serbske jutrowne jejko
  • sněhakowarske kursy za rjadownju 7
  • dwaj koncertaj zhromadnje z hudźbnej šulu a ze zakładnej šulu
    • adwentny koncert
    • koncert na kóncu šulskeho lěta

Jězba do Jendźelskeje

Wosebity wjeršk našich šulerjow rjadownje 9 je jězba do Jendźelskeje, hdźež skići so jim móžnosć, cuzu rěč nałožować a so w njej wukmanjeć.

Šulerjo skruća a rozšěrjeja swoje znajomosće jendźelšćiny na mjezynarodnej rěčnej šuli Kent School of English. Tu wuknu zhromadnje ze šulerjemi z cyłeje Europy. Jako hosćo w swójbach, přez mnohostronske popołdniše aktiwity a ekskusije, zeznaja typiski jendźelski wšědny dźeń.

Hodowne wiki

Dalši wosebity wjeršk našeho šulskeho žiwjenja leži w dohodownym času.

Kóžde druhe lěto přewjedźemy naše swójske hodowne wiki. K tutej přiležnosći předstajimy ekskluziwnje za hodowne wiki nowokomponowany, z nowymi tekstami a zajimawej choreografiju wuhotowany hodowny musical. Kóžda rjadownju přihotuje w běhu projektoweho tydźenja hodownu dekoraciju, adwentne wěncy a druhu adwentnu pychu, wudźěłki z drjewa a mnohe překwapjenki za naše wiki.

Šulska jězba

Třeća wosebitostka našeje šule je zhromadna šulska jězba, kotruž přewjedźemy kóžde třeće lěto.

Šulerjo wobdźěleja so na projektach, kotrež so w rjadowniskim cyłku abo po lětnikach přewjedu.